LEGAZPI CITY – Nagpapadagos pa sa ngonian an ipigkokondusir na search and rescue operations kan Coast Guard substation asin Disaster Risk Reduction and Management office kan banwaan kan Aroroy, Masbate katakod kan pagkawara kan sarong 7-anyos na na aki makalihis na maglubog an piglulunadan na motorized banca kaibanan an tolo pang pamilya.
Sa ekslusibong intrevista kan Bombo Radyo Legazpi ki PO1 Mario Allan Rosales, Substation Commander kan PCG Aroroy, hale suboot na Bulan, Sorsogon an nasabing bangka na naglayag kan banggi kan Hulyo 12 pasiring sa Carles, Iloilo para sa sarong kasalan.
Nasabat kan mga ini sa biyahe an makusog na paros asin an darakulang ukol kan kadagatan na pigtubudan na ipo-ipo na siya man na rason kan pagtaob kan motorized banca na lunad an sampulong katawo.
Naisalbar an siyam na pasahero na nagsapar nin mga lugad asin natawanan na nin tratamentong medikal mientras na padagos pang pighahanap an sarong babaye na binistong si Rea Roso Molo na napaseparar sa mga partidario kaini makalihis an insidente.
Ikaduwang aldaw na ngonian kan paghahanap sa nasabing aki alagad padificilan pa urog na sa makusog na bulos kan uran sa nasabing provincia.