Ipigduon ni Police Staff Sergeant (PSSG) Arla Ray Paciencia, an tiyahing pulis ni alyas “Nash,” saro sa mga menor-de-edad na suspek sa school shooting incident sa Tacloban City kan Hunyo 22, 2026, na ilegal suboot na naglaog sa saiyang harong an pamangkin asin kinuwa an saiyang badil.
Marurumduman na nagluwas sa imbestigasyon na ginamit an badil kan pulis kan menor de edad na suspek na nambadil sa San Jose National High School, na ikinagadan nin tulong mga estudyante.
Sa pag-atendir kaini sa pagdangog kan Senate Committee on Women, Children, Family Relations and Gender Equality kan Hulyo 1, ipigduon kan pulis na sapiritan na naglaog an saiyang pamangkin sa harong niya antes mangyari an insidente.
“Nash unlawfully entered my own house. It’s not a room po, it’s my own house,” segun ki Paciencia.
Pag-istorya kaini na pinirit na buksan ni Nash an nakasaradong locker kun sain nakalaag an badil.
“He forcibly damaged my locker. It was locked. My house is locked as well po,” dugang pa niya.
Ipinaliwanag ni Paciencia na an badil an nakalaag sa sarong plastic locker na naka-lock asin nakalaag sa laog nin gun box, asin siya sana an may kapot kan susi kan saiyang harong asin kan nasabing laagan.
Inako man kan pulis na bako angkop sa standard na safety vault an ginamit niyang taguan nin badil, asin pigpensar na bastante na an security kaini huli ta siya sana an naga istar sa harong.
Presenteng nasa kustodiya kan mga otoridad sinda alas ‘Rod’ asin ‘Nash’ mantang pinaghahalat an paglipat sa social welfare and development facility, kung sain sinda isasairarom sa intervention asin rehabilitation program.
