LEGAZPI CITY – Padagos na nagsasagibo nin river re-channeling an Tiwi Municipal Disaster Risk Reduction and Management Office (MDRRMO) sa Barangay Baybay, sa naunambitang lugar sa provincia kan Albay nganing maibitaran an pagbabaha.
Segun kay Tiwi MDRRMO Head Manuel Damo sa intrevista kan Bombo Radyo Legazpi na pigbuksan an parte kan baybayon nganing duman na direktang maglaog asin magluwas an tubig pag low asin high tide.
Piggigibo an lakdang na ini nganing maibitaran an pagbabaha pag nag-uuran na pigsasabayan kan high tide kun sain naapektaran an mga kaharaongan na nakatugdok sa baybayon.
Sa pag-agi kaya kan panahon, natahuban suboot an dating pig-aagihan kan tubig asin naghanap nin mas hibabang agihan kun kaya nagmistulang salog an mga nagkapirang kaharongan.
Pigtaram pa ni Damo na susog sa saindang datos, pirmihang pig-aabot nin pagbabaha an nasabing barangay asin tulos na naeebakwar an mga residente sa ligtas na lugar.
Dae man ninda magagarantiya na maiibitaran an pagbabaha nin huli ta depende man gilayun an magigin kamugtakan kan barangay sa magigin kusog kan bulos kan tubig sa mga salog.
Piglalaoman kaini na matatapos an mitigation structure nin huli ta ini an magigin lyabi nganing maibitaran an pagbabaha sa barangay Baybay.
Kahagadan kan opisyal sa saindang nasasakupan na magin mapagmatyag sa saindang lugar asin ipagpaabot tulos sa saindang opisina an mga naeeksperyensyang kadifisilan asin peligrosong sitwasyon sa saindang pagrugaring.
