LEGAZPI CITY — Ipigbabato kan opisyal kan 2nd Engineering District Office kan Department of Public Works and Highways (DPWH) sa Albay sa driver an basol sa nangyaring 12-road vehicle road mishap kasuodma.
Segun ki Don Asejo sa intrevista kan Bombo Radyo Legazpi na dawa na panuon nin warning signs an tinampo, kun dae man naghihiling sa mga nakasurat sa tinampo an drivers, mangyayari an aksidente.
Useless kaya suboot an signages huli ta an mga resposableng drivers sana an naghihiling kaini alagad an iba, dae.
Dugang pang kun may problema man an tinampo na kinaganan na nin rumble strips asin pinahewas pa, surusemana kuta may aksidente.
Segun ki Asejo, dapat na pigmamantenir kan driver an pigmamanehar na behikulo.
Suhestyon man kaini na magkaag nin traffic personnel sa may Camalig-Daraga area asin magkaag nin speed limit ngani na maski warang aksidente alagad nagsobra sa rekas kan padalagan, dadakupon an mga driver.
Mientras tanto, iaakomodar man suboot kan opisina an kahagadan ni Barangay Busay Capt. Ramon Nidua ngani dae na liwat mautro an insidente.
