Nakukulangan o bitin pa, siring kaini iniladawan kan presenteng kalihim kan Department of Justice na si Secretary Jesus Crispin ‘Boying’ Remulla an manungod sa testimonya kan mag-agom na Curlee asin Sarah Discaya.
Segun mismo ki Justice Secretary Remulla, bitin an mga testimonya nganing tumindog huli ta bako suboot bastante an mga ini sana.
Tinawan doon kan kalihim na kaipuhan maglaog digdi nin nagkapirang ebidensya na pwedeng magpatunay na totoo an impormasyon na ipinaabot sa departamento.
Sa ngonian, kabale an mag-agom na si Curlee asin Sarah Discaya sa mga pigkokonsiderar na ‘protected witnesses’ kan Department of Justice.
Sa ibong kan pagigin imbuelto sa mga maanomalyang flood control projects, an mag-agom na Discaya isinairarom sa Witness Protection Program alagad temporaryo o probisyonal sana.
Kaya ngani na mapatunayan an saindang testimonya, nanindugan si Justice Sec. Remulla, kinakaipuhan man na magpresentar nin ‘secondary evidence’.
Dugang pa kan kalihim, poporbaran o hahanapan niya nin paagi nganing hagadon o tugotan na makauli si Pacifico Discaya.
Gikan digdi, inako ni Justice Secretary Remulla na dae tulos matatapos an saindang pag-analisar asin pag-ebalwar kan mga natipon na testimonya.
Maagi pa suboot ini sa proseso asin panahon huli ta pigtutubodan na an isyu kan flood control projects an posibleng pinakadakulang kurapsyon sa historya kan nasyon.
