LEGAZPI CITY-Nairehistro kan international organization for independent tanker owners na dakula an ibinababa kan numero kan mga mga barkong nag-aagi sa Strait of Hormuz kasunod kan paglala kan tensyon sa rehiyon.
Hale kaya sa karaniwang dai mababa sa 130 barko kada aldaw bago sumiklab an sigalot sa rehiyon, nasa sarong digit na sana suboot an numero kan mga barkong naggagamit kan ruta digdi.
Ini matapos na magpalitan liwat nin airstrikes an Estados Unidos asin Iran kan Miyerkules asin Huwebes.
Susog sa militar kan Estados Unidos, an saindang mga airstrike nakatama sa mga 90 na target kan militar sa Iran.
Kaiba digdi an nagkapirang pasilidad na harani sa Strait of Hormuz.
Obheto suboot kaini na paluyahon an kakayanan kan Iran na atakihon an mga comercial na mga barko asin sibilyan na nagaagi sa nasabing ruta.
Kinumpirma man kan Iran na dai mababa sa 14 katawo an nagadan sa pinakahuring pag-atake kan Amerika.
Nai-report man kan Iran state media na igwang mga tinamaan na harani sa Bushehr nuclear power plant, mantang wara pang opisyal na pahayag an Estados Unidos mapadapit digdi.
Afuera pa digdi, igwang panibagong missile attack na pigsasagibo sa Kuwait, Jordan, asin Iraq kun sain igwang base militar kan Estados Unidos.
