LEGAZPI CITY — Inaseguar kan Legazpi City Disaster Risk Reduction and Management Office (CDRRMO) an dagos-dagos na pagtabang sa mga residente na mantenidong apektado kan nagpapadagos na aktibidad kan bulkang Mayon.
Sa intrevista kan Bombo Radyo Legazpi ki CDRRMO head Engr. Miladee Azur, nakatalaan na tawanan nin temporamenteng source of livelihood an mga ini urog na an mga paraoma sa laog kan 6-kilometer Permanent Danger Zone (PDZ) sa tabang naman kan mga national government agencies.
Katakod kaini, pigpipinalisa na ni City Agriculturist Jess Callos an Master List kan mga affected farmers o pig-aapod na economically displaced residents tangarig na organisadong maibariwas an tabang para sa mga ini.
Magigirumduman na resulta an nasabing programa sa nakaaging meeting kan mga local government units na apektado kan Mayon eruption kaibanan si Presidential Adviser on Political Affairs asin crisis manager Secretary Francis Tolentino.
Mayor na ikinahahadit kaya sa nasabing orolay an posibilidad kan paglaog kan mga paraoma sa PDZ huli sa pagbaba sa Alert Level 3 status alagad mantenido man an peligrong dara kan nag-aalburotong bulkan.
