LEGAZPI CITY — Wara pa sa kabanga kan target an naipatindog na mga temporary learning spaces (TLS) sa probinsya kan Albay para sa mga apektadong estudyante kan Department of Education (Deped) personnel kan nag-aalburotong Bulkang Mayon.
Basado sa latest data kan Office of the Civil Defense (OCD) Bicol, nasa 92 TLS pa sana an napuunan nang ipagibo kun sain 60 sa mga ini an nasa 49% progress o below completion mantang nasa 39 an madali nang matapos.
Kaibanan sa mga tinawan nin budget allocation para sa pagtitindog kan TLS an mga banwaan kan Camalig, Guinobatan, Daraga, Malilipot asin Sto. Domingo siring man an mga syudad kan Ligao, Tabaco asin Legazpi.
Mientrastanto, pinuunan na man kan Legazpi City an pagpapatindog kan 33 TLS maski wara pang nareresibe na budget.
Nasa 459 Temporary Learning Spaces (TLS) an target na maipatindog na piglalaoman na makakatabang sa 74, 208 affected learners asin 1,987 DepEd personnel.
Sa ibong kaini, padagos man an klase kan mga estudyante mantang kumpiyansa an DepEd na masusunod an calendar of school days.
Marurumduman na nasa 49 na eskwelahan o labi sa 900 na classrooms an nagseserbing evacuation centers kan mga residenteng hali sa 6-kilometer Permanent Danger Zone (PDZ) hanggang 8-kilometer Extended Danger Zone (EDZ).
