Kinumpirmar kan Department of Justice na mapuon na an mawot kaining maisakatuparan na planong technical diving operation sa Taal Lake.
Ini nganing mahanap an posibleng lawas kan mga nawawarang sabungero na pigsabing inilubong suboot sa nasabing parte kan lawa.
Segun ki Justice Secretary Jesus Crispin Remulla, an pagsagibo kan nasabing pagsisid sa Taal Lake an mapuon ano man aldaw ngunyan na semana.
Pangengenotan ini kan mga ahensya kan gobyerno sa tabang kan Philippine Navy asin Philippine Coast Guard na enot nang ipighayag an saindang kahandaan para sa operasyon.
Alagad nilinaw man na bako ini katakod sa saindang paghagad asistensya gikan sa gobyerno kan Japan para sa kadugangang kagamitan.
Paliwanag kan kalihim na kakapadara pa sana kan surat kan nakaaging semana kaya ngunyan pa sana ninda piglalaoman na maresibi an kasimbagan.
Dugang pa ni Justice Secretary Jesus Crispin Remulla na dae maisasantabi an posibilidad na pwedesir may ibang lokasyon man kun saen inilubong an mga nawawarang sabungero.
Alagad sa ibong kaini tinawan-doon kaini na makusog asin matibay an saindang pigkakaputan na impormasyon kun saen dapat ikundusir an technical diving operation.
Magigiromdomang enot nang ibinuyagyag ni alyas ‘Totoy’ o Julie ‘Dondon’ Patidongan na inilubong suboot an mga biktimang sabungero sa parte kan Taal Lake makalihis gadanon.
