LEGAZPI CITY – Nagbugtak nin mga canopy tents sa mga border control points kan Task Force Kalinigan at Kaayusan sa mga lugar kan ciudad kan Legazpi na nakapalaog sa 6KM permanent danger zone kan Bulkang Mayon.
Segun ki Task Force Kalinigan at Kaayusan Head Mark Andy Marbella sa intrevista kan Bombo Radyo Legazpi na nakapwesto an saindang mga tents sa presente sa may parte kan Barangay Bogña asin sa Barangay Matanag.
Naka-antabay man an saindang grupo sa duwang border control points nganing magtaong asistensya sa mga residenteng nasa laog kan permanent danger zone na mawot mag-ebakwar sa mga evacuation centers.
Kabale ninda sa pagbabantay an mga personahes na gikan sa manlain-laing ahensya kan Gobierno arug kan City Disaster Risk Reduction and Management Office, Philippine National Police, Bureau of Fire Protection nganing mag-antabay sa mga posibleng mangyari.
Pigtaram pa kan opisyal na may ipigtugdok man sindang tent sa Barangay Tamaoyan bilang magserbing sirungan kan mga otoridad na nagbabantay man sa mga nagkokondusir nin Mayon viewing.
Pagsyerto niya man na maski nakatutok an gabos na mga law enforcement agencies sa sitwasyon kan Bulkan an nagpapadagos pa man liwat an saindang operasyon laban sa mga serye nin illegal parking asin kaulangan sa kakalsadahan sa ciudad.
Patanid man ni Marbella sa publiko na dae na magporbar na maglaog sa 6KM permanent danger zone kan Bulkan asin magpili na sana sa mga aprubadong lugar nganing hilingon an lava flow kan Mayon.
