LEGAZPI CITY — Inapod na pekeng jeepney modernization ni Piston President George San Mateo an programa kan administrasyon ni Pres. Rodrigo Duterte kasunod kan ginibong hearing kan Senate committee on public services kasuodma.
Sa intrevista kan Bombo Radyo Legazpi ki San Mateo, ipighayag kaini na bako totoo an pigsasabi kan gobierno na warang mangyayaring phase out.
Matenir sana suboot an pangaran alagad an mga yunit kan jeep na nasa 240,000 sa enterong nacion an padiit-diit na hahalion hasta sa 2020.
Sinabi pa ni San Mateo na bako totoong parte kan pagpapautob kan Department of Transportation (DOTr) kan existing traffic rules an kampanyang “Tanggal Bulok-Usok” kundi katakod ini kan pagpapautob kan jeepney phase out.
Piggagamit sana suboot an kampanya bilang “smoke-screen” ngani na mailaog asin maipabakal an overpriced asin makantidad na lunadan na mawot iribay sa lumang jeep na dae kaya kan bulsa kan mga sadit na operator.
