LEGAZPI CITY – Pigpawi kan Tactical Operations Group Bicol (TOG 5) an kahandalan kan publiko mapadapit sa mga naglalayog na mga helicopter urog na pag-banggi sa ciudad nin Legazpi.
Segun ki Philippine Airforce (PAF) TOG 5 Deputy Group Commander Lieutenant Colonel Joel Vergara sa intrevista kan Bombo Radyo Legazpi na naglalayog an black hawk helicopter pag banggi nin huli ta parte ini kan saindang training para sa proficiency flight kan mga piloto asin testing kan mga ekipahe kan nasambitang air vehicle.
Magigirumduman na an black hawk helicopter an bagong bakal kan AFP asin pigagamit para sa relief operation sa kabikolan partikular na sa pangrarapado ni bagyong Kristine kan nakaaging taon.
Minsanan lang suboot an paglayog kan mga behikulo sa ciudad nin huli sa mga naeksperyensyahan na mga pag-uuran na dara kan shearline kan mga nakaaging aldaw.
Kasabay kan paghagad nin dispensa sa publiko, pigsyerto kan opisyal na wara man dapat ikatakot asin ikahandal an mga tawo sa ciudad mantang pig-abisuhan na man kaini na irarayo na sana sa mga matawo an pagpapalayog kan helicopter nganing dae na magkawsa nin abala sa iba.
Paghahanda na man suboot an mga pagpapalupad enkaso may kaipuhanon na i-rescue pag-banggi or madiklom an palibot partikular na sa panahon kan kalamidad.
Handa man suboot sindang iimpormar an Local Government Unit na saindang paglilipatan nganing dae na mautro pa an siring kaining pangyayaring nagkakawsa nin takot asin kahandalan sa publiko.
Pig-asigurar ni Vergara na preparadong tumabang an Philippine Airforce sa mga bikolano partikular na sa panahon kan sakuna asin emerhensya.
