LEGAZPI CITY — Inasegurar ni Presidential Adviser on Political Affairs asin Mayon Eruption Crisis manager Sec. Francis Tolentino na mapadagos an pagtatao nin tabang sa Mayon evacuees hasta dae pa natatapos an krisis.
Sa intrevista kan Bombo Radyo sa sekretaryo, sinabi kaining tuloy-tuloy man giraray an ipapaabot na suporta kan national government agencies siring man kan partner local government units (LGUs).
Patotoo digdi, sa pag-atendir kan opisyal sa flag ceremony sa Muntinlupa City sa Lunes, pormal na iaabot an donasyon na P3 milyon makalihis na hagadon ni Tolentino sa ciudad na maging foster parent ini kan banwaan kan Daraga.
Afuera digdi, matao man suboot nin tigsararong milyong piso sa siyam na apektadong munisipalidad sa Albay an Quezon City sa pamamayo ni Mayor Herbert Bautista.
Sienerto pa kaini na mdiretso sa mga nangangaipuhan an ipigtataong tabang asin dae na maagi sa sainda.
Mientras tanto, magkakaigwa suboot nin pag-oolay an umaalkalde kan Guinobatan na si Mayor Gemma Ongjoco asin National Housing Authority (NHA) para sa konstruksyon kan permanent relocation center.
