LEGAZPI CITY—Nakikipagkoordinar na an Tabaco City Police Station sa lokal na gobierno asin simbahan sa ciudad kan Tabaco para sa nagdadangadang na Semana Santa sa sunod na semana.
Segun ki Tabaco CPS Acting Chief of Police, Police Lieutenant Colonel Edmundo Cerillo Jr., sa intrevista kan Bombo Radyo Legazpi, na nakapaglatag naman sinda nin mga kapulisan sa mga manlaen-laen na lugar.
Afuera digdi, ipiglatag naman kan saindang opisina an mga kapulisan sa mga terminal asin pantalan huli sa pig-aantipisiparan na mga mabakasyon sa nasambitang ciudad.
Mientrastanto, nagpatanid man ini sa mga motorista urog na sa mga mauli sa kanya-kanyang lugar na magbalon nin halabang pasensya ngani maibitaran an ano na iwal sa tinampo asin dapat isipon an magigin resulta kan aksyon urog na kun nadadara kan saindang emosyon.
Siring man na dapat paghilingon an kamugtakan kan mga behikulo bago magbiyahe.
