LEGAZPI CITY- Labi an pasasalamat kan alkalde kan ciudad nin Tabaco na si Mayor Krisel Lagman-Luistro sa sarong Taiwan based international foundation na nanao nin hasta sa P28,000 sa kada pamilya na naapektaran kan mga nag-aging bagyo sa provincia.
Ngunyan na semana kan magtrending sa social media an mga post manungod sa Tzu Chi Foundation na namili nin mga apektadong pamilya sa ciudad nin Tabaco asin nanao nin rinibong ayuda.
Sa intrevista kan Bombo Radyo Legazpi kay Mayor Krisel lagman-Luistro, kinumpirmar kaini na nakipagkoordinar sainda an foundation na naghagad nin listahan kan mga apektadong pamilya asin nagpaaram na mananao nin financial assistance alagad dae pighuna na dakulang kantidad palan an ipapanao.
Nasa P18,000 kaya an pinakahibaba na pigtataong ayuda kan foundation para ini sa pamilya na may duwang miyembro mantang pinakahalangkaw suboot an nag-aabot sa P28,000 para man sa pamilyang may limang miyembro pataas.
Sa pagkakarkulo kan opisyal nag-aabot na sa P230 hasta P250 milyon an naipanao na kwarta kan foundation sa nasa 10,000 na mga apektadong pamilya sa ciudad.
Nilinaw kan opisyal na haloy ng nagtatabang an nasabing foundation sa ciudad tuyong may nag-aaging kalamidad, kung sain minsan naman ining nagpa-clean up drive asin nagpapasweldo sa mga nagtatabang na residentes.
Katakod kaini, nangapudan an alkalde sa mga residentes na nakaresibe kan ayuda na gamiton sa tama an nakuang pinansyal na tabang partikular na sa pagpapakaray kan harong o paghahanap nin pagkakabuhayan.
