LEGAZPI CITY- Excited na ngunian an Lokal na gobyerno kan Tabaco City sa pagresibi kan saindang regional award na gikan sa National Nutrition Council.
Kun babalikan napili an siudad kan Tabaco bilang Regional Green Banner asin CROWN o Consistent Regional Outstanding Winner in Nutrition awardee.
Segun kay Mayor Krisel lagman- Luistro kan Tabaco City sa naging intrevista kan Bombo Radyo Legazpi, taon-taon nagkakaigwa nin assessment an NNC sa mga performance kan mga nutrition program kan lokal na gobyerno.
Dakula an naging kaogmahan kan opisyal huli ta bako lang sinda napili bilang CROWN awardee kundi pigrekognisar man bilang ika- 2nd Runner-Up si Virgie Ajero kan Brgy. Oson para sa 2023 Regional Outstanding Barangay Nutrition Scholar asin si Efleda B. Boboyo, an 2nd Runner-Up para man sa 2023 Regional Outstanding City Nutrition Program Coordinator.
Pigbuyagyag man kan alkalde an saindang sekreto kun niata namamantinir ninda an nasabing onra.
Saro na digdi an pagkakaigwa nin sadiring programa na tatak Tabaco asin bako lang nutrisyon kan mga kabataan an saindang pighihiling kundi magin an mga bados para maibitaran an pagkabansot asin pigtututukan man ninda an mga elderly.
Mientrastanto, nakatalaan sa maabot na Septyembre 5 ngunian na taon an awarding ceremony na gigibuhon sa siyudad kan Legazpi.
