LEGAZPI CITY – Padagos an monitoring kan Tabaco City Disaster Risk Reduction and Management Office saindang bisinidad mapadapit sa pagtaas sa level 2 kan alert level kan Bulkang Mayon.
Segun ki Tabaco CDRRMO head Gel Molato sa intrevista kan Bombo Radyo Legazpi na makalihis an pagtaas kan alert level an nagpaluwas na sinda nin kasuguan na kun sain paramientras na ipinagbabawal an pagsakat sa nagkapira nindang tourist attraction arug kan Mayon Planetarium.
Nakikipagtabangan na man sinda sa Philippine National Police siring man sa Barangay Disaster Risk Reduction and Management Council kan mga barangay na nakakasakop sa mga ini nganing tulos na magbugtak nin checkpoint para sa pagbabawal sa paglaog.
Paramientras na man munang ipinundo an operasyon kan sarong restaurant na nakapalaog sa Mayon Unit Area mantang nakikipagkoordinar na man sinda sa mga barangay nganing impormaran an saindang mga residentes na nasa laog kan 6km permanent danger zone.
Paglilinaw pa kan opisyal na magsasagibo sana sinda nin evacuation efforts sa mga residentes kun enkaso isinakat na kan Philippine Institute of Volcanology and Seismology sa alert level 3 an bulkan o nagkaigwa ini nin phreatic eruption.
Basado man sa saindang datos an pwedesir umabot sa 383 families sa saindang ciudad o katampad kan 1,380 indibidwal na nagtetenir sa laog kan 6km permanent danger zone an saindang i-ebakwar enkaso maglala an sitwasyon.
Pagdoon pa ni Molato na mawot nindang enuton an seguridad kan saindang mga namamanwaan asin turista kaysa sa turismo kan saindang ciudad sa mga arug kaining nangyayari sa Bulkang Mayon.
