LEGAZPI CITY – Padagos an monitoring kan Tabaco City Disaster Risk Reduction and Management Office sa saindang pantalan mapadapit sa byahero na mapasiring sa provincia kan Catanduanes huli sa huma ni Bagyong Paolo.
Segun ki Tabaco CDRRMO head Gel Molato sa intrevista kan Bombo Radyo Legazpi na sa presente an wara pa man sindang nairerehistrong stranded passengers makalihis na makabyahe pa kasuhapon an last trip pasiring sa naunambitang provincia.
Base man sa saindang naresibing mga report an may mga roro vessels na naka-eksperyensya nin makukusog na ukol kan kadagatan alagad sa kagayunan sana an mga darakulang sakayan an mga ini asin salbadong naka-agi.
Nasa huriskdiksyon suboot kan Philippine Coast Guard an pagpapaluwas kan suspensyon kan operasyon kan mga byahe kan mga behikulong pandagat asin wara pa sindang nareresibing notice sagkod ngonian.
Pigtaram pa kan opisyal na lalaoman ninda na maruso sa mga masunod na oras an mga byahero urog na an mga hale sa National Capital Region huli sa padagos na operasyon kan mga roro.
Pagdoon pa niya na nakipagkoordinar na man sinda sa mga baranggay officials nganing tawan abiso an mga parasisira na maglawod sana sa saindang municipal waters asin dae na muna magporbar magsira harani sa Catanduanes.
Promesa ni Molato sa saindang nasasakupan na sa mga siring kaining klase nin kalamidad urog na ngonian na Typhoon season an preparado sinda huli ta mas maray na suboot na magin preparado kaysa sa magsisi sa epekto kaini.
