LEGAZPI CITY – Tukoy na kan mga otoridad an suspek sa panggagadan sa sarong pulis sa Batuan, Masbate.
Pinagbabadil si Police Staff Master Sergeant (PSMS) Oscar Alegada, 43-anyos mantang nakatindog sa may highway kan Brgy. Canvañez asin nakikipag-olay sa nagkapirang personahes kan pulisya kasubanggi.
Sa ekslusibong intrevista kan Bombo Radyo Legazpi ki PLt. Luis Olicia, hefe kan Batuan PNP, positibong ipigtukdo kan mga nakahiling sa pangyayari na si Ali Llabres alyas “Butchoy”, 32, na residente kan Brgy. Royroy sa kaparehong banwaan, an suspek.
Nagtutubod an pulisya na pagbalos an posibleng motibo sa krimen kan suspek na napag-aramang bodyguard ni dating Mayor Charmax Jan Yuson.
Alagad pig-aaram pa ngonian kan mga otoridad an pwedeng nagin iwal kan duwa.
Nagluluwas man sa imbestigasyon na nakatalikod an pulis na chief investigator kan Batuan PNP kan pagbabadilon sa payo kan suspek, gamit an dae pa maaraman na kalibre.
Padagos man na pinaghahanap sa ngonian an nasabing suspek na nagtetenir na at-large.
