LEGAZPI CITY- (Update) Pormal nang sinangatan nin kasong rape asin homicide ang saro sa mga suspek sa panggagadan ki Diane Rose Razo kan Brgy. Pangpang, banwaan kan Donsol sa Sorsogon.
Mismong an hepe kan Castilla Municipal Police na si PS/Insp. Joren Gutay an nagpaabot kan impormasyon sa Bombo Radyo na sinangatan na nin kaso si Romnick Almasco alagad napag-araman sa pamilya kan biktima na na segun naman sa impormasyon kan imbestigador na nakadulag si Almasco sa kustodiya kan mga nagbabantay na suldados.
Dae maibitaran kan agom ni Diane Rose na si Joel Razo na magluwas nin kulog-boot sa nasambit na pangyayari siring man an kwestiyonableng pagdulag kan suspek sa irarom kan mahigot na seguridad mantang dae man kaini maako an posibilidad na gibuhon pang testigo sa krimen an enot nang itinukdo kan pamilya na hudyan na nakaibanan kan biktima antes na mawara asin naagnas nang bangkay kan marekober kan mga otoridad.
Sa ibong na lado, pangapodan ngonian kan bilog na pamilya an tulos na ikakadakop kan nakadulag na suspek urog na an ina ni Diane Rose na si Racquel Baradia.
Hagad man kaini an marekas na paghiro kan kaso tangarig na mapanimbag na an mga nasa likod kan krimen.
