LEGAZPI CITY—Kinumpirmar kan kapulisan na paramientras na nakalibre sa kulungan an suspek sa pambabadil-gadan sa duwang babae sa Barangay San Roque, Tabaco City.
Segun ki Tabaco City Police Station Chief of Police Police Lieutenant Colonel Edmundo Cerillo Jr., sa intrevista kan Bombo Radyo Radyo Legazpi, nakalibre an suspek huli sa ipinaluwas na orden kan City Prosecutor’s Office.
Makalihis an saindang isinumiter na dokumentos para sa inquest proceedings an nagluwas sa resolution na igwang pagkwestyon sa validity kan warrantless arrest laban sa suspek.
Segun saiya na warrantless arrest ini huli sa an ginibo ninda an sarong hot pursuit operation kun saen makalihis an insidente an tulos na nagresponde an mga kapulisan, nagkundusir nin imbestigasyon, asin tulos na nabisto asin naarestar an suspek.
Pagdugang ni Cerillo na pigrespeto ninda an desisyon kan piskalya sa nasabing resolusyon asin masunod sinda sa magigin lakdang mapadapit digdi.
Dugang kan opisyal na nasunadan na nin kaso an suspek asin pigsugo na mag-atendir ini sa preliminary investigation hearing ngonian na bulan kan Nobyembre.
