LEGAZPI CITY — Nadakop man liwat an sarong wanted na persona makalihis na magbalong magdulag sa ikinondusir na operasyon kan mga otoridad sa banwaan kan Guinobatan, Albay.
Binisto an suspek na si Ronaldo Paclibar, 43-anyos asin residente kan P-6, Sitio Pier, Brgy. Muladbucad Pequeño.
Si Paclibar an nahahampang sa walong mandamiento de aresto huli sa pagbalgar sa Republic Act 9262 o Anti-Violence Against and Their Children Act of 2004 kun sain may rekomendadong pyansa an pito nin P12,000 mantang P24,000 man an saro.
Segun sa personahes kan Guinobatan Police sa pangengenot ni PC/Insp. Jason Rey Colico, RID-RSOG Bicol na pinamayuhan ni PC/Insp. Alex Edgar Butch Moraleda asin Criminal Investigation and Detection Team-Albay kaiba si PC/Insp. Luke Ventura, nagbalong magdulag an suspek alagad nadakop ini sa umahan poco mas o menos 200 metros an rayo sa saiyang residencia.
Durante man kan body search, nakua sa suspek an tulong sadit na sachet kan pigtutubudang shabu na idinara sa Regional Crime Laboratory Office-Bicol para sa drug test asin laboratory examination.
Sa ngonian, nagtetenir na sa Guinobatan Police Station an suspek para sa magkakanigong disposisyon.
