LEGAZPI CITY – Dakop na an saro sa mahigot na pigmo-monitor na durugista kan Philippine Drug Enforcement Agency (PDEA) Albay sa ipigkondusir na entrapment operation sa Barangay Bitano syudad kan Legazpi.
Segun ki PDEA Albay Agent Enrique Lucero, nabisto an suspek na si Dave Borromeo na nasa drug watchlist kan PDEA asin Philippine National Police na residente kan Barangay Sabang sa parehong syudad.
Narekober sa buy-bust operation an pigtutubudang shabu na isasairarom sa laboratory exam.
Pigkakarkulo man kan mga otoridad na poco mas o menos 50 gramo an pigpapabakal kan suspek sa saiyang mga kliyente sa nasabing barangay.
Base sa nagunong impormasyon kan PDEA, sarong preso sa Muntinlupa City Jail an supplier ni Borromeo na dating residente kan Legazpi asin sentisyado na.
Haloy naman suboot nindang pigmo-monitor an suspek kun kaya nakua man ninda an aydentipikasyon kan supplier alagad dae pa pwedesir ipaluwas ngunyan.
Ini suboot an primerong operasyon kan PDEA sa syudad puon kan paglaog kan 2017.
Kakahampangon kan suspek an kasong pagbalgar sa Republic Act 9165 o an Comprehensive Dangerous Drugs Act of 2002 partikular na an pagbalgar sa seksyon kan pagpapabakal nin droga.
