LEGAZPI CITY- Makalihis an tolong aldaw nin shutdown ibinalik kan Albay Power and Energy Corporation (APEC) an suplay nin kuryente sa isla kan Rapu-Rapu.
Mayo 15 kan dagos ng putolan nin suplay nin kuryente an banwaan makalihis na magpalyar na magbayad kan P28.9 milyon na natatada hali sa P32 milyon na bill kan mga konsumidores.
Sa intrevista kan Bombo Radyo Legazpi kay Pat Gutierez an tagapagtaram kan APEC, ibinalik an kuryente base sa kasuguan kan Department of Energy na iyo an may mandato na magsierto may suplay nin kuryente an mga lugar sa Pilipinas.
Alagad magtitinir sana an suplay nin hasta sa 48 oras kung sain sa nasabing panahon dapat na makagibo na nin solusyon an lokal na gobyerno kan Rapu-Rapu sa tabang kan DOE, National Electrification Administration asin National Power Corporation nganing makahanap nin solusyon sa natatada pang bill.
Naglalaom an opisyal na makakahanap nin maray na paagi an lokal na gobyerno asin mga ahensya lalo pang milyon an nalulugi sa APEC sa kada bulan na dae nakakabayad an mga taga-Rapu-Rapu.
Napag-araman na taong 2018 pa kan enot na magpatanid an APEC sa Rapu-Rapu manungod sa saindang bayadan alagad dae man ini nasolusyonan hasta sa dagos ng maputolan kan suplay nin kuryente.
