LEGAZPI CITY – Pignombrahan an 20 suldados na kaibanan sa matrayumpong operasyon kontra sa New People’s Army (NPA) sa ipigkondusir na Awarding Ceremony sa kampo kan 2nd Infantry Battalion, Philippine Army sa Barangay Bacolod, Milagros, Masbate.
Pinangenotan ni Maj. Gen. Manolito P. Orense, Commander kan 9th Infantry Division an pagtatao nin Military Merit Medal Award asin Certificate of Recognition sa nasambitan na mga suldados sa pangengenotan ni 1Lt. April John S. Del Rosario.
Magigirumduman na naka-engkwentro kan pwersa kan 2nd Infantry Battalion asin 22nd Infantry Battalion an nasa poco mas o menos 20 miyembro kan rebeldeng grupo na nagresulta sa pagkagadan kan apat na NPA asin pagkakarekober kan saindang mga armas.
Pig-omaw man ni Maj. Gen. Orense an pignombrahan na mga suldados asin an bilog na pwersa kan 2nd Infantry Battalion asin ipighayag na kapot kan Philippine Army an momentum huli sa magkakasunod na trayumpo puon kan ikanselar an ceasefire asin ilunsar kan gobyerno an all-out-war kontra sa mga rebelde.
Pinagirumduman man kan opisyal an mga suldados na dae maka-kampante asin padagos na magin malikay sa pagkundusir nin ano man na aktibidad ngani na masiyerto an seguridad kan gabos.
