LEGAZPI CITY — Nahahandal an Albay Police Provincial Office na posibleng maglangkaw pa an numero kan insidente nin paghugot sa provincia ngonian na taon.
Sa intrevista kan Bombo Radyo Legazpi ki Albay PNP spokesperson Pol. S/Insp. Manny Ramos, nag-abot na tulos sa 18 an nairehistrong suicide incident sa Albay sa laog nin apat na bulan.
Kun ikukumpara sa datos kan nakalihis na taon, nakapagrehistro sana nin kabilugang 21 suicide incident sa provincia.
Base sa data kan PNP, an ciudad kan Legazpi an may pinakadakol na kaso na may anom, apat sa Bacacay, tulo sa ciudad kan Ligao, asin tigsararo na sa mga banwaan kan Guinobatan, Daraga, Sto. Domingo, Malilipot asin ciudad kan Tabaco.
Sa nasabing numero, 17 an kalalakihan mantang saro sana an babaye.
Pinakadakol man sa biktima an nag-eedad 41-anyos hasta 50-anyos na pigsusundan kan 11-20 anyos.
Segun ki Ramos, nagluluwas na an problema sa pamilya an pinakarason kan paghugot kan mga biktima apwera sa health illness asin emotional problem.
Abiso kan opisyal na tutukan o tawan nin giya kan mga magurang an saindang mga aki ngani na dae mag-isip na putulon an sadiring buhay. Dapat kaya na yaon suboot an pagkamoot sa laog kan lambang pamilya.
