LEGAZPI CITY—Nangapudan an sarong student leader sa mga mawot na magdalagan na kajovenesan para sa 2026 barangay and Sangguniang Kabataan elections na dae sana magsentro sa pig-aapod na pagpa-Liga an saindang mga proyekto en kaso na maelihir sa posisyon.
Segun ki Bicol University Student Council Public Information Officer Jan Sander Aban, sa intrevista kan Bombo Radyo Legazpi, na an pagigin SK member an bako sana basta-bastang posisyon asin makusog an pwersa kaini kun kaya dapat na magsentro man an saindang proyekto sa orolay nin gender and development asin iba pa.
Ipig-abiso man niya sa mga botante na dae na pag-utrohon an mga salang nagibo kan mga nakaaging panahon asin dae na liwat na pagsuportaran an mga naimbuelto sa kurapsyon.
Nangapudan man si Aban sa mga kajovenesan na may kakayahan nang magboto, na magboto nin matali asin magbotong matali, siring man an pagkonsiderar sa mga background kan mga madalagan na indibidwal sa eleksyon urog na ngunyan na nahihiling na ninda an talamak na mga pangaran na nadadawit sa kurapsyon.
Siring man na gamiton an kaaraman sa social media na ikampanya kun ano an mga dapat na iboto kan komunidad.
Tinawan-duon man niya na dapat bilang joven an dapat gamiton an pwersa nganing ikampanya an mga politiko na tultol asin an dae nagpapabaya na magtinir sa kurap na sistema sa nacion.
