LEGAZPI CITY- Nangangapodan ngonian an Department of Environment and Natural Resources (DENR) sa mga kandidato sa barangay asin Sangguniang Kabataan (SK) elections na girumdumon pa man giraray an pangangataman sa kapalibutan partikular na sa paparaning campaign period.
Piglalaoman na kaya kan ahensya na dakol na namang posters an ikakabit sa mga puon nin kahoy sa gilid kan dalan o saenman sa pagtuntong kan Mayo 4 hasta 12.
Sa intrevista kan Bombo Radyo Legazpi ki DENR Bicol Dir. Oscar Dominguez, magkakaigwa nin ‘strict enforcement’ sa mga regulasyon asin tatawanan nin magkakanigong aksyon an mga ipapaabot na complaint urog na sa mga nalugadan na kahoy huli sa pagpako kan posters.
Ipigduon pa ni Dominguez na kasaro kan Commission on Elections (COMELEC) an ahensya sa pagbabantay kan mga ‘epal posters’ na iligal na ipigkakabit sa kun saen-saen sana.
Nakakaag man kaya sa Presidential Decree 953 an pangangataman asin pagkamoot sa mga puon nin kahoy na dakula an naitatabang sa mga tawo asin kapalibutan.
En kaso man na makagibo nin pagbayolar sa anuman na probisyon, ipigdidikta man kan Section 3 na posible ining magresulta sa multang puon P500 hasta P5,000 o pagkakakulong nin dae mababa sa anom na bulan alagad dae malagpas sa duwang taon.
