LEGAZPI CITY- Hirit ngonian kan National Food Auhority (NFA) Bicol na pahaliputon an peryodo kan paghahalat sa 250, 000 metric tons rice importation sa Abril, imbes na sa bulan kan Hunyo.
Sa intrevista kan Bombo Radyo Legazpi ki NFA Bicol spokesperson Lilibeth Jacob, napag-araman na tolo hasta apat na aldaw na sana suboot an itatagal kan stock sa full blast operation mantang pighihiling na back-to-zero na sa hudyan na bulan kan Marso o enot na semana kan Abril.
Inako man kan opisyal na dakulang tabang an NFA rice sa pagneutralize kan sitwasyon kan presyo kan bagas sa merkado kun saen nagbabadol sa P45 an pinakabaratong kilo kan commercial rice mantang nag-aabot man sa P52 hasta P55 sa mga banwaan sa isla magin sa island provinces.
Napag-araman na ipinundo an distribusyon kan NFA kaitong Enero 13 asin ibinalik kan Pebrero 19 alagad nakatalaan na ipundo giraray sa Marso 9 sa mga provincia kan Sorsogon, Camarines Sur asin Camarines Norte mantang idadagos-dagos an suplay sa Masbate asin Catanduanes.
Mientras tanto, hinale man ni Jacob an pagkahadit kan mga residenteng apektado kan nag-aalburotong bulkang Mayon sa Albay asin sinabing prayoridad pa man an calamity-stricken areas mantang nakaantabay man sa pag-alalay an iba pang NFA regional offices.
