LEGAZPI CITY — Nagpatanid an Social Security System (SSS) sa mga miyembro kaini asin sa publiko dapit sa posibleng paglakop kan mga pekeng tseke makalihis na maipaaram sa pension fund na nakaresibe an sarong grocery store nin bayad gamit an pekeng tseke kan SSS.
Segun ki SSS Senior Vice President for Luzon Operations Group Josie G. Magana, an nasabing pekeng SSS check na nagkakantidad nin P20,000 an ginamit ngani na mabayadan an groceries sa sarong supermarket sa Virac kan sarong nagngangarang Gina S. Henzon.
Segun sa sekretarya kan establisyemiento, inako ninda an tseke makalihis na maberipika na balido an voter’s ID kan babaye.
Alagad kan idedeposito na an tseke sa bangko, napag-araman na peke ini kun kaya tulos man na inireport sa SSS-Virac.
Tulos man na tinawanan nin direktiba ni SSS-Virac branch head Divina T. Avila si Edgar S. Rubio, officer-in-charge kan administrative section na i-check an nasabing pangaran asin SSS number ni Henzon kun saen napag-aramang imbalido an numero asin dae nakarehistro an pangaran kaini sa SSS database.
Apwera pa digdi, pineke man an pirma na nasa tseke na mga empleyado kan SSS-Urdaneta.
Kasunod kaini, nagkondusir na nin imbestigasyon sa Barangay Palta Small sa nasabing banwaan na iyo an lugar na nakasurat sa tseke.
Base sa imbestigasyon, bako man residente si Henzon kan nasabing barangay.
Katakod kaini, nag-abiso an ahensya sa publiko urog na sa mga establisiyemento na mag-apod sa SSS ngane na iberipika antes na akuon an tseke bilang pambayad.
