LEGAZPI CITY- Pigpapalikay kan Social Security System an mga miyembros asin pensioners kaini kontra sa naglalakop na mga scammers.
Napag-araman kaya na sa ibang mga branch kan ahensya, igwang naresibe na email na naghahagad kan impormasyon kan sarong miyembro sa paagi kan pagpapa-click kan ipinadarang link.
Segun ki Social Security System spokesperson Jeanette Mapa sa intrevista kan Bombo Radyo Legazpi na dakol na mga paagi ngunyan an mga scammers ngani na makapang biktima siring na sana kan phishing kun sain nagpapadara nin pekeng email ngani na makuwa an impormasyon kan publiko.
Pigbabantayan man ngunyan kan ahensya an smishing o panloloko sa paagi kan pagpapadara nin text message na nagsasagin sagin na hali sa Social Security System asin nago-ofresir nin mga pekeng transaksyon.
Nagpatanid man an opisyal kontra sa mga click bait o nagpapalakop nin mga salang impormasyon dapit sa ahensya.
Huli digdi, nagpagirumdom si Mapa sa mga miyembro asin pensioners na an gabos na mensahe hali sa ahensya an igwang nakalaag na hali mismo ini sa SSS.
