LEGAZPI CITY — Ibinasura kan Sangguniang Panlalawigan kan Albay an Municipal Ordinance No. 04-2017 o an ordinansa na nagtutugot na iere nin live an mga pagbubulang sa paagi kan paghook-up sa mga TV on-line providers sa manlaen-laen na cockpit arena sa banwaan kan Daraga.
Segun sa Sanggunian, imbalido asin warang bisa an ordinansa na nagre-regulate man kan pag-isyu nin special permit.
An pagbabasura an bilang simbag sa kontrobersyal na legislative measure na matugot sa mga residentes na maghiling nin live an pagbulang nin manok sa Daraga.
Bilang deklarasyon kan pagiging imbalido, sinabi kan Sangguniang Panlalawigan na warang legal na basehan an LGU Daraga sa pag-authorize kan nasabing telecast.
Nagtutubod man si Albay Vice Gov. Harold Imperial na an pag-apruba sa siring na ordinansa an sarong pagbalgar sa eksistidong ley asin regulasyon sa nasyun.
