Legazpi City- Uminabot na sa probinsya kan Catanduanes an tabang na gikan sa probinsya kan Sorsogon dara an mga contruction materials para sa mga Cantaduanon na labing nadanyaran kan nakalihis na Bagyong Pepito.
Sa intrevista kan Bombo Radyo Legazpi kay Dong Mendoza, an tagapagtaram kan Probinsya kan Sorsogon, kasuudma kan mag’abot an team kan Sorsogon kaibanan an medical team, mobile clinic asin mga truck na lunad an construction materials. Mantang ngunyan na aldaw maabot na man an second batch kan tabang hale sa Sorsogon sakay man liwat an dugang na mga construction materials.
Uminabot man sa labi 10,000 na coco lumber, 3,000 na yero asin mga pako an dara kan Sorsogon sa probinsya.
Segun pa sa opisyal naobserbaran kan saindang team an dakulang danyos na sinapar kan probinsya nin Catanduanes.
Mientras tanto nakatalaan man na magpasiring an medical team kan Sorsogon sa banwaan kan Bagamanoc para magsagibo nin medical assistance.
