LEGAZPI CITY – Inasigurar kan gobyerno probinsyal kan Sorsogon bilang parte kan saindang commitment, na preparado ining magtao nin tabang sa probinsya nin Catanduanes huli sa pagrapado kan Super Typhoon Pepito.
Segun ki Dong Mendoza, an tagapagtaram kan provincial government nin Sorsogon, sa intrevista kan Bombo Radyo Legazpi, na sinda makikipagkoordinar sa gobyerno kan Catanduanes sa kun ano an pwede nindang maitabang sa nasambit na probinsya.
Dugang pa kan opisyal na nakahanda an saindang mga ekipahe siring kan mga heavy equipment na magagamit sa road clearing operations.
Sinabi man kan opisyal na an commitment kan saindang gobyerno-probinsyal sa pagtabang sa Catanduanes haloy nang naoobserbaran siring na sana kan nakaaging bagyong Rolly na tuminama man sa Catanduanes kan Nobyembre 2020.
Marurumduman sa suway na intrevista kan Bombo Radyo Legazpi kay Catanduanes Governor Boboy Cua, sinabi kaini na kaipuhan nin probinsya nin dakol tabang tangarig maparikas an pagbangon kan mga residente na naapektaran kan bagyo.
