LEGAZPI CITY – Hero’s welcome an ipigsabat kan 9th Infantry Division kan Philippine Army sa suldadong nagadan sa nagpapadagos na bakbakan sa pagultanan kan tropa kan gobyerno asin teroristang grupo na Maute sa ciudad kan Marawi.
Sa intrevista kan Bombo Radyo Legazpi ki Capt. Randy Llunar, tagapagtaram kan 9th ID, binisto an nasabing suldado na si PFC Reymart Carloto kan 51st Infantry Batallion na nakadestino sa Lanao del Sur.
Napag-araman na Hunyo 2 kan magadan an suldadong tubong Sorsogon makalihis na magsapar nin tama sa tikab gikan sa M14 rifle sa nasabing engkwentro.
Isinakay an bangkay sa C-130 airplane na hale sa Misamis Oriental kun saen kasabay man an inang si Maria Carloto asin tugang na babayeng si Rhea mientras na alas-10:45 nin aga nakaabot sa ciudad kan Legazpi.
Segun ki Llunar, tolong taon asin limang bulan man an 26-anyos na suldado na nagserbisyo sa pwersa kan gobyerno sa Lanao del Sur.
Nguhod sa apat na magturugang si Carloto na gikan sa Sorsogon kun kaya sa Brgy. Cogon, sa banwaan kan Gubat man iuuli an bangkay kaini.
Mientras tanto, nakatalaan na tawanan nin prayer vigil sa lugar si Carloto hasta sa mailubong mientras na gagawadan man kan military honors asin 21-gun salute.
