LEGAZPI CITY — Ipighatod na ngonian na aldaw sa huring hantungan kaini an Sorsoganon na suldado na nagadan sa pagbungkaras kan kariribukan sa ciudad kan Marawi.
Bandang alas-dose kasubagong udto kan magpaaram na an mga partidarios asin dayupot na mga amigo kan pamilya ki PFC Reymart Carloto sa banwaan kan Gubat, Sorsogon.
Sa intrevista kan Bombo Radyo Legazpi sa tugang kaining si Ria, ipigheras kaini na haros aro-aldaw na pigpapa-ring ninda an cellphone kan tugang tangarig sana masierto na nasa salbadong kondisyon pa ini alagad kan Hunyo 2 na dae na ninda makontak an tugang saka na nakumpirmar na binawian ini nin buhay sa tahaw kan bakbakan.
Dugang pa kan tugang na sa pinakahuring pag-oolay ninda ni Carloto sa paagi kan text, inasegurar ni Ria sa tugang na siya na an bahala sa mga magurang kun saen nagreply ini nin simpleng ‘K.’
Mientras tanto, tinawanan nin 21-gun salute an nasabing suldado mientras na napag-araman na makakaresibe nin livelihood asin iba pang asistensya an pamilyang nawalat kaini na personal na ipig-opresir ni Presidente Rodrigo Duterte sa paghahampangan kan mga ini sa Fort Bonifacio sa Taguig City.
Nguhod sa apat na magturugang si Carloto asin wara pang agom huli ta obheto suboot kaini an makatabang nguna sa mga magurang.
