LEGAZPI CITY – Naisangat na an kasong Reckless Imprudence Resulting to Homicide sa suspek sa pagkagadan kan sarong sultero sa banwaan kan Matnog, Sorsogon.
Aksidenteng nabangga an biktimang si Enrico Masarate Quilang, 39 anyos kan Brgy. Hidhid kan parehong lugar.
Nangyari an insidente sa porsyon kan Maharlika Highway sa Brgy. Gadgaron, Matnog kan bigla na sanang magbalyo sa tinampo an biktima asin aksidenteng mabangga kan motoristang si John Michael Deri, 28 anyos kan Brgy. San Pedro, Irosin.
Huli sa kusog kan pagkabangga, tuminapok an biktima na nagresulat sa malalang tama sa lawas asin payo kaini.
Naidara pa sa ospital an biktima alagad ipigdeklarar ng dead on arrival.
Sa ngunyan, nasa kustodiya na kan mga otoridad an suspek na tulos man na suminuko makalihis an insidente.
