LEGAZPI CITY – Ipigbubusol ngonian kan sarong kongresista an pag-activate kan motor vehicle inspection system (MVIS) sa kada rehiyon na piglalaomang makakapagpababa sa sa halangkaw numero kan road crashes sa kada taon.
Pag-eksplikar ni outgoing Catanduanes Rep. Cesar Sarmiento sa intrevista kan Bombo Radyo Legazpi na dawa pa dakol nang naisaley na mga road precautionary measures, mantenido man an halangkaw na datos kan road crashes.
Kaibanan sa mga pighihiling na causa kaini an pakagibo kan mga tinampo, disiplina kan mga drayber siring man an road worthiness kan mga behikulo.
Segun ki Sarmiento, dapat na maasegurar kan Land Transportation Office (LTO) kun road worthy an behikulo antes na mairehistro.
Aminado an opisyal na nakukulangan sa pag-eksamin sa mga behikulo sa paagi sana nin smoke emission alagad sabot man na mangangaipo ini nin dakulang pondo.
Napag-araman na kaibanan man si Sarmiento sa mga asin nagkapot kan chairmanship sa Committee on Transportation sa 17th Congress.
