LEGAZPI CITY — Kinontra kan sarong kongresista an propuesto na pagbabawal sa mga provincial bus sa paggamit kan EDSA.
Sa intrevista kan Bombo Radyo Legazpi ki Ako Bicol Partylist Rep. Rodel Batocabe, inulangan kaini an propuesto kan Metro Manila Development Authority (MMDA) na pagbawalan an mga bus sa major thorough fare huli ta masapar man an mga pasahero na hale sa Bicol asin Calabarzon.
An kongresista kaya an namayo sa technical working group hearing na ginibo sa Kamara.
Huli sa ban, kinakaipuhan pa kan mga pasahero na maglipat nin vehikulo asin madudugangan pa an gastos imbes na gamiton na sana sa ibang pangangaipuhan.
Dugang pa ni Batocabe, maipo-promote sana kan lakdang an mga “colorum” kun ibababa an mga pasahero asin mas madakol an malaog sa EDSA.
Ipigsuhestyon man kan kongresista na ngani maresolberan an problema, tawanan nin responsibilidad an mga mayayaman na nag-aagi sa EDSA na solo sana sa behikulo asin dae man i-enganiar an paglunad sa transport network services.
