LEGAZPI CITY — Kinumpirmar kan manhamiento kan 9th Infantry Division (ID), Philippine Army (PA) an pagkagadan kan sarong soldado sa nangyaring engkwentro kontra sa New People’s Army (NPA) kan Sabado sa Barangay Magogon, Camalig, Albay.
Segun ki Capt. Joash Pramis, Division of Public Affairs Office (DPAO) chief, binawian nin buhay si Corporal Filipe Delfino Jr. lll, 32-anyos asin nakadesignar sa Bravo Company kan 2nd Infantry Batallion na nakabase sa Villarhermosa, Daraga.
Parte si Delfino kan team ni 1st Lt. Marvin Ong na nagkokondusir nin Community Support Program (CSP) sa nasabing lugar kan biglang madangog an sarong putok nin badil hale sa dae maaraman na posisyon asin tinamaan ini sa tulak.
Makalihis ini, nagpaputok na suboot an poco mas o menos 5 miembro kan NPA kun kaya nagdepensa na an mga soldado.
Naidara pa sa ospital si Delfino alagad binawian man liwat nin buhay.
Segun ki Pramis, padagos man giraray an CSP sa lugar asin nagkokondusir pa nin pursuit operation an kasuldaduhan sa may kagibo kan krimen.
Posible man suboot na aksyon ini kan NPA na habo magkaigwa nin solusyon an problema sa lugar na sinda mismo an nagkrear asin piggagamit sana bilang propaganda ngani makakua nin suporta. Saro sana suboot ining patotoo na habo kan rebeldeng grupo an peace and development sa mga lugar.
Mientras tanto, nakaalerto man suboot an Philippine Army ngonian na Semana Santa kun sain nagpaluwas nin direktiba an headquarters.
Segun ki Pramis, nakipag-olay na sinda sa Philippine National Police (PNP) para sa pagmantenir kan peace and order o mapangataman an solemnity kan selebrasyon kan Semanta Santa sa enterong rehiyon.
