LEGAZPI CITY— Pinag-aadalan na kan Southern Luzon Command (SOLCOM) kan Armed Forces of the Philippines an isasagibong ligal na lakdang katakod kan nadiskubreng pagibuhan nin improvised explosive device kan New People’s Army (NPA) siring man an nairehistrong engkwentro sa mga nakalihis na aldaw.
Sa intribista kan Bombo Radyo Legazpi ki SOLCOM spokesperson Maj. Gil Perez, tinawan duon kaini an pinirmahan na CARIL sa pagultanan kan gobyerno asin National Democratic Front (NDF) kun sain ipinagbabawal an paggamit nin IED sa gyera sa irarom kan International Humanitarian Law.
Ibinida pa ni Perez na buminadol na sa bente singko an isinagibong government initiated operations sa Bicol mantang benteng personalidad na man an na-neutralize sa mga nasambitan na operasyon.
Dugang pa kaini na padagos an pagluya kan pwersa kan mga rebelde huli na man sa bilog na suporta kan mga namamanwa sa pangapodan ni Presidente Rodrigo Duterte sa pagpundo sa dae nin kamugtakan na mga labanan mantang dae na man makakapagsagibo nin major tactical offensive operation an mga ini huli na man sa pagkagadan asin pagkadakop sa mga key leaders kan grupo siring man an pagkarekober sa mga assets kaini arog na sana kan mga haralangkaw na kalibre nin badil.
Mientrastanto, pinapalikay man ni Perez an lado kan Philippine National Police (PNP) sa mga modus operandi o taktika kan kalaban sa pag-inflict nin casualty kun sain sarong pulis an nalugadan makalihis na tambangan asin pasabugan nin IED kan mga pinagtutubudang NPA sa probinsya kan Masbate makalihis na magresponde sa sarong shooting incident.
