LEGAZPI CITY- Isinairarom naman sa alert status an gabos na operating unit kan Southern Luzon Command (SOLCOM) katakod kan nangyaring pagsakyada kan teroristang Maute group sa ciudad kan Marawi.
Sa intrevista kan Bombo Radyo ki SOLCOM spokesperson Major Gil Perez, nagpapadagos man suboot an mga ipigsasagibong preemptive measures kan Pwersa Armada kan Pilipinas sa kabikolan siring man sa mga rehiyon kan CALABARZON asin MIMAROPA.
Mayor na pigtutukan kan intelligence command unit an pag-ibitar asin pag-secure sa mga area na pwedesir na gamiton bilang entry kan mga terror groups.
Inasegurar man kan opisyal na bastante an pwersa sa mga posibleng kalaban asin preparado na magpadara nin augmentation force sa Mindanao kun en kaso na kaipuhanon alagad sa ngonian, wara pa man suboot na ipigbabang direktiba katakod kaini urog na nasa irarom nin ley martial an bilog na isla.
Pag-eksplikar pa ni Perez na sa mga siring kaining sitwasyon, mantenidong dara kan mga suldados an constitutional mandate sa pagprotehir sa mga ciudadano asin paglaban para sa estado.
Sa ibong na lado, tinawang-duon ni Major Perez na contained asin kontrolado kan AFP an gabos na area mapadapit naman sa insurgency kan rebeldeng NPA sa nasasakupang lugar alagad nagpromesang daeng papalusuton an mga pwersang nagmamawot na magsabay sa kariribukan na ipiglunsar kan mga terorista sa Minadanao.
