LEGAZPI CITY — Ikinaogma kan pamayo kan Southern Luzon Command (SOLCOM) an naging performance kan miembro kan militar sa nangyaring engkwentro kontra sa New People’s Army (NPA) sa Brgy. Joroan, Tiwi, Albay.
Sa paghampang ni Major General Benjamin Madrigal Jr. sa sarong press conference, sinabi kaini na naging magayon man giraray an resulta kan insidente dawa pa nalagasan an tropa, napugulan man an mga rebelde na magsagibo pa kan pangingikil o extortion sa lugar.
Kun babalikan, nagka-engkwentro an nasa 30 miembro kan NPA asin tropa kan militar na nagdurar nin 15 minutos na ikinagadan kan rebeldeng si Pablo Cuerdo alyas Ka Ambo asin saro pang rebelde.
Nakadulag man an ibang kalaban na padagos pang pigsususog kan mga militar.
Nagpasalamat man si Madrigal sa Philippine National Police (PNP) na nagback-up sa mga ini asin an Scene of the Crime Operatives (SOCO) na nagproseso sa mga bangkay kan nagadan asin kan pinangyarihan kan insidente.
