LEGAZPI CITY — Binuksan na an bagong tugdok na slaughterhouse sa ciudad kan Legazpi na pinaglalaoman na dakula an maitataong tabang para sa ciudad.
Pinangenotan an pagbubukas kan edeficio kan mga opisyal kan National Meat Inspection Service (NMIS) na sinda Acting Director II Dr. Fernando Andes asin Executive Dir. Ernesto Gonzales, City Veterinarian na si Dr. Nancy Andez asin si Legazpi Mayor Noel Rosal.
Ikinaogma kan gabos an inagurasyon kan slaughterhouse huli sa makalihis an pirang taon, nagkaigwa man giraray nin siring na pasilidad na kinakaipuhan na maray.
Segun ki Mayor Rosal, huli sa nasabing pasilidad, mas mapapadali asin maitatao an maray na seguridad sa malinig na suplay nin karne.
Nangapodan man si Rosal na dae pagpabayaan asin atamanon nin maray an pasilidad ngani na mapakibangan pa sa mga maabot na taon.
Dakula man an pasasalamat kan opisyal sa mga indibidwal na nagtabang asin presente sa inagurasyon na testigo suboot sa paggibo kan panibagong proyekto kan ciudad.
