LEGAZPI CITY- Nagtiripon an nagkapirang mga skaters hali sa manlain lain na mga provincia ngani na magpartisipar sa Skate Boarding Event na ipigkondusir sa ciudad kan Legazpi.
Segun sa organizer kan aktibidad na si Karl Vincent Sevilla sa intrevista kan Bombo Radyo Legazpi na taun-taon nindang pigigibo an nasabing aktibidad ngani na tawan dalan an mga nahihilig sa nasabing sports.
Pag-storya kaini na dakol na mga local merchandise an nag-ofresir nin pa-premyo para sa mga skaters.
Kaibanan sa mga ini an sapatos, T-shirts asin iba pang mga pa-premyo.
Mientras tanto, sa suway na intrevista ki Anton John Ferrer na sarong skater hali pa sa provincia kan Catanduanes, sinabi kaini na dakulang tabang para sa saiya an nasabing sport urog pa sa sitwasyon niya na sarong person with disability asin warang legs.
Aminado ini na naka eksperyensya siya nin bullying huli sa saiyang kondisyon alagad sa paagi kan sports, nagkakaigwa siya nin kumpiyansa sa sadiri.
Pinayuhan man ni Ferrer an mga kapwa niya jovenes na dae magpa apekto sa anuman na tataramon kan ibang tawo asin ipagpadagos sana an mga bagay na magpapaugma sainda.
