LEGAZPI CITY- Nagsakat na sa tulo an nadiskubreng pigtutubudang sinkhole sa upland barangay kan Pinagdapugan sa banwaan kan Polangui, Albay.
Sa intrevista kan Bombo Radyo Legazpi ki Polangui Municipal Disaster Risk Reduction and Management Council (MDRRMC) head Socorro Sambitan na afuera sa enot nang nahiling na sinkhole sa laog kan eskwelahan, duwa pa an nahiling sa residential area sa likudang parte kan Pinagdapugan Elementary School.
Segun ki Sambitan, nakipagcoordinar na an ahensya sa Mines and Geosciences Bureau (MGB) para sa pagpapadara kan sample kan daga.
Napag-araman na pinakadakula sa mga ini an nasa laog kan eskwelahan na nasa 1.5 meters an diametro asin 2.4 meters man an rarom.
Pinagtutubudan kan opisyal na an makusog na pag-uran an nagcausa kan paglumoy kan daga asin pagbagsak kan daga na itsurang sinkhole asin pigkakahandalang magdakula pa.
Enot naman na nagkanselar nin klase sa nasabing eskwelahan sa pagkahandal na makadiskwedo sa mga estudyante an nasabing sinkhole.
Mientras tanto, sa suway man na intrevista kan Mines and Geosciences Bureau (MGB) Bicol Director Engr. Guillermo Molina Jr., inasegurar kan ahensya na tulos na mapadara nin personahes sa lugar tangarig na mapag-adalan kun ano an causa kan sinkhole asin kun posible magdara nin peligro sa buhay kan mga residente.
