LEGAZPI CITY—Posibleng magkaigwa nin paghalangkaw sa singil kan kuryente sa Albay sa masunod na billing period huli kan posibleng paglangkaw man kan presyo sa kuryente sa Wholesale Electricity Spot Market, ini segun sa pahayag kan Albay Electric Cooperative, Inc. (ALECO).
Segun ki Aleco Spokesperson Anj Galero, sa intrevista kan Bombo Radyo Legazpi, an nasabing paglangkaw kan presyo kan kuryente sa Wholesale Electricity Spot Market, an iyo an naglalaog sa generation charges sa billing ninda sa mga Member-Consumer Owners.
Dugang niya naenot na man na ipinaluwas kan National Grid Corporation of the Philippines (NGCP) na magkakaigwa man nin paglangkaw sa transmission charges, na saro man sa pigbabayadan kan mga miembro-konsomedores.
Tinawan-doon man ni Galero na bako an ALECO an nagtatakda kan presyo kan kuryente sa Spot Market, kundi nakaangkla ini sa generation charges.
Siring man na bako sinda an nagpapataw nin presyo kan kuryente sa transmission charges asin Ancillary Service kundi an NGCP.
Segun saiya gabos kan mga ini an pigkonsiderar na pass-through charges o gabos ipapasa sa mga konsyumer an aktwal na pigsisingil gikan sa power suppliier asin transmission service providers.
Naglalaom an opisyal na masabutan ini kan miembro-konsomedores asin kun may mga kahaputan man pwedesir na magbisita sa social media page kan nasabing electric cooperative.
