LEGAZPI CITY- Irerespeto suboot kan Simbahang Katoliko an padusang kagadanan kun in kaso maisabatas ini.
Alagad antes pa man ini mangyari, nakahiling na nin dakulang agyat an Simbahan urog na sa liwat na pagpapagirumdom sa mga tawong nagpapabor sa nasambitan na propuesto.
Sa intribista kan Bombo Radyo Legazpi ki Father Rex Arjona kan Diocese of Legazpi, sinabi kaini na luwas na sinda sa mga magigin desisyon kan gobyerno asin yaon sana sinda ngani na padagos na magpagirumdom.
Pigkokonsidirar na agyat ni Father Arjona an padagos na pagtukdo dapit sa importansya kan buhay kan tawo.
Maski suboot an mga Santo Papa, haloy nang nagsabi na bako na tama para sa kinaban an padusang kagadanan asin dapat nang halion sa mga nasyun na nagpapa-utob kaini.
Dugang pa kan padi, makikipagtabangan sinda sa mga legal groups asin papakusugon pa an prison ministry.
Klinaro kaini na pigsusurog kan Simbahan an mga biktima alagad dapat man giraray na tabangan an mga nagkasala na mawot na magbagong buhay.
