LEGAZPI CITY- Mainit na pigsabat an mga siklista na hali pa sa manlaen laen na nasyon sa pag-abot kan mga ini sa syudad kan Legazpi para sa Le Tour De Filipinas.
Segun sa saro sa mga partisipantes na hali pa sa England na si Daniel Whitehouse na nagrerepresentar kan saiyang team na Terengganu Pro-Asia Cycling Team, excited na siya para sa aktibidad alagad nakakamati siya nin nerbiyos para sa ikokundusir na race ngunyan na aldaw.
Pighayag man kaini na labi an saindang preparasyon kun sain lima sindang riders na marepresentar kan saindang nasyon.
Pinasalamatan man kaini an mga tawong padagos na nagtatao saiya nin inspirasyon asin suporta kaibanan na an saiyang pamilya, sarong lisensyadong organisasyon nin biking sa Malaysia, asin an mga sponsors hali sa gobyerno kan England.
Pagbuyagyag ni Whitehouse, 13-anyos pa sana siya kan magpuon sa nasambitan na sports kun sain nagin parte na ini kan saiyang buhay huli ta bisekleta na an hanap niya sa pagkamata pa sana sa pagka-aga.
Dugang pa kan nasambit na siklista, sa pagbibisikleta niya namamatean an tunay na kalayaan kaya pigpadangat na niya an sport na ini huli ta digdi niya suboot namamatean an tunay na kalayaan.
Nangalas man ini sa gayon kan Mt. Mayon asin inapod na ‘friendly’ an mga Pilipino asin nagpasalamat sa pagigin totoong tawo asin pagigin maugma kan mga Bicolano.
