LEGAZPI CITY- Isinairarom na sa pag-analisar kan Sorsogon Police Provincial Office an naglalangkaw na insidente kan mga pambabadil na nairerehistro sa provincia kan Sorsogon.
Sa intrevista kan Bombo Radyo Legazpi ki Sorsogon PNP Provincial Director PS/Supt. Ronaldo Cabral, ipigbuyagyag kaini na naobserbaran an paglangkaw kan datos sa paglaog kan bulan kan Marso ngonian na taon alagad sa pagpupuon kan Enero asin Pebrero, dae man nakapagrehistro kan mga shooting incidents na opisyal kan barangay o miembro kan pulisya an biktima.
Dugang pa ni Cabral na nairehistro man sa parehong peryodo kan nakaaging taon an halangkaw na mga insidente kaini na buminadol sa 17 kan 2016 mientras na 14 man kan 2015.
Aminado man ini na dakol sa datos an nairehistro kan banwaan kan Matnog.
Nagtutubod an opisyal na posibleng may kinaaraman sa insurgency an mga nasabing insidente makalihis na mag-collapse an negosasyon sa orolay pangkatoninongan alagad sienerto kan opisyal na nagpapadagos pa an imbestigasyon sa mga ini.
Magigirumduman na kan nakaaging semana kan enot na maibareta an panggagadan sa retiradong pulis sa Manog na sinundan man ngonian na semana kan pambabadil sa brgy. kagawad sa Gubat, hepe kan intelligence section sa PNP Matnog asin kasuodma sana kapitan kan Irosin.
